الشب لما يكون عنده لقاء أول مع بنت  بصحى بدري عشان يلحق موعده الساعه اربعه , بيروح بحلق لحيته عند ابو صطيف الحلاق ، وبيخليه يعمل له خيط وينعّم له الرقبه , وبعدين بيطلع عند صاحبه المعروف انه وضعه المادي جيد.بيفوت على غرفته وطبعا صاحبه بيكون لسه صاحي من النوم  ولابس شبّاح وشورت وشعره منكوش لكن بصحى عشان يجهّز صاحبه للقاء الاول... !!!

بيفتح له الخزانه عشان ينقي منها لبسه مرتبه . بروح الشب بينقي قميص فايع وبنطلون جينز ازرق مكوي وجاكيت بدله فايع. ولأنه نمره رجل صاحبه اصغر من نمرته, بيضطر الشب يجيب لصاحبه كندرة اخوه الكبير البوز رفيع , بس بيحكيله : من شان الله دير بالك عليها ما تفضحني وأوعك تغبرها ،

 وبعدين بيفوت على الحمام وبيغسل شعره....  وبيحط واكس على شعره وبيخليه واقف ...  وبيلبس الأواعي الفايعين  وصاحبه طبعا بيسرق له عطر ابوه الشانيل عشان يرش منه رشتين وبعدين بتداين من صاحبه عشرين دينار لزوم الطلعه وبيطلع. طبعا وهو نازل الدرج من بيت صاحبه, صاحبه بيوصي فيه وصايا اللقاء الاول : بدي ياك اسد من اولها .

بيطلع الشب وبيمر على صاحبه الثاني ويبستلف منه سياره كيا سيفيا نمره بيضه, على اساس انها سيارته, وبيمر على دكانة ابو حسن عشان يستعمل المغسله ويتمضمض مي وبيشتري لأول مره بحياته علكه ستميرول وبكيت دخان مربورو, وبيمر على صاحبه رامي لينك عشان يشحد منه تلفون n 90 بدل تلفونه 3310 لمده ساعتين.

وبياخد البنت على الموعد وبيكون بكوفي شوب في الرابيه, طبعا اول مره هو بيفوته.. وبيدخل بيسلم على الجرسون مباوسه على اساس انه زبون دائم في المحل قدام البنت اللي بتكون ماشيه جنبه ومش مصدقه انها تعرفت على شب جنتل وزوء  مثله.
 
 وبعد القاء الاول بيرجع كل شي متل ما كان ...  وفي اللقاء الثاني بيطلع معها على منتزه عام وبشتريلها بعشر قروش ترمس وبيقعدو تحت شجره وبيحكيلها إنه باع السياره  والخلوي, وان أواعيه مبهدلين عشان مروّح من الشغل وان أبوه بالمستشفى واضطر يدفع كل المصاري الي معاه لأبوه المريض !!

 وبياخد منها خمسه وثلاثين قرش عشان يروّح عالبيت عشان مصاريه وقعو منه في السرفيس..
وكمّل الحكاية من عندك!!!!!!!!!