|
كان يا مكان ...
اجاني عقد عمل مميز ورائع للسفر على السعوديه اثناء سفري لاداء فريضه الحج وبلفعل قررت اني اسافر مثلي مثل الآلاف من الشباب المغتربين ...
وبلصدفه عند رجوعي من رحلة الحج انسرق كمبيوتري اللاب توب من سيارتي وداخل شنطه الكمبيوتر جواز سفري و وموبايل شحاطة مكسورة شاشته وشوكلاطه كوكو عاشور ماكل منها لقمه وحدة وسيديات خاصه وخمس قروش فكه وصورتي وانا صغير ..شايفين الخسائر !!
نرجع لموضوعنا بعد نسيان صدمه فقدان الجواز بلفعل بدئت السباق الماراثوني في تجهيز اوراقي فوق الشهر ونص بين الدوائر الحكوميه وبين الجوازات عشان بدل فاقد
و اخيرا جهزت المعاملة ولكن!!!!!!! بدئت المعاناه بالزياره اليوميه للقنصليه السعوديه!!!! والغريب انها قنصليه سعوديه ولكن موظف الكاونتر اردني !!!! وموظف الامن اردني!!! والي بعمل الشاي والقهوة اردني!!! والي برد عتلفونات الشكاوي اردني!!! ومصدق الشهادات السعوديه اردني!!!! والي بختم المعاملات اردني!!!! والي بدقق المعاملات اردني!!!! والي بيعطيك الرد اردني!!!! وعامل الحاسوب اردني!!! والمحاسب اردني !!!! وما بتشوف اي شي سعودي سوى العلم السعودي على سطح القنصليه السؤال الغريب هاي قنصليه سعوديه ولا اردنيه ؟؟؟؟
وتم رفض معاملتي خمس مرات وكلها لنفس السبب!!! والسبب : جواز سفرك جديد بدنا الجواز القديم .. او بتستنى لما يصير عمر جوازك سنه !!! يا سلام !!!!!!!!!!!!!!
مش فاهم شو السبب بانهم بدهم الجواز القديم يمكن ما بياخدو جواز عمرو اقل من سنه ؟؟؟؟؟ ليش خايفين انه لساته برضع ومش مفطوم ؟؟ او يمكن بدهم يتاكدو اني ما غيرت اسمي ؟؟؟ او اني مش مخبي داخل الجواز القديم عمل او حجاب للقنصليه ؟؟؟؟
في المره السادسه والاخيره قدمت اوراقي للشخص الاردني الي علكاونتر فقام بادخال المعامله للشخص الاردني الي بجانبه فقام بادخالها للشخص الاردني الي جالس بلخلف وبعد النظر في المعامله ارجعها للشخص الاردني الثاني وقام بارجاعها للشخص الاردني الاول ورماها بوجهي وحكالي معاملتك مرفوضه للمرة السادسه وما تورجيني وجهك هو انا ما عندي سيرة غيرك !!!!!
ولما صرت ازعبر وعصبت قام الشخص الاردني بمناداه الحارس الاردني من شركه امن اردنيه خاصه وبمساعدة الفراش الاردني وقامو بطردي برا القنصليه السعوديه!!!!
ولما لفيت من الجهه الثانيه الي بدخل منها القنصل السعودي مع اني اشك انه في قنصل سعودي من الاصل !!!! قابلني الحارس الاردني وقام بطردي ولما رنيت على القنصليه وطلبت احكي مع مساعد القنصل او اي حد سعودي داخل هاي القنصليه جاوبني الشخص الي رد علي وهو كمان اردني مافي حد هون ما ترجع ترن وسكر السماعه بوجهي ولما رنيت كمان مره رد الشخص الاردني و سكر بوجهي 3 مرات متتاليه
وفي النهايه مزقت المعامله ورميتها امام كاونتر المراجعين امام عشرين شخص او اكثر . فلواحد يضل في بلده اشرفله وبصراحه الاشخاص الموجودين دتخل القنصليه من اصحاب الجنسيه الاردنيه حرام يكونو اردنين او حتى يعيشو بينا لانه مش طريقه معامله بتعامل فيها ابن بلدك وجد عيب عليكم
انتو هيك ما بتسيئو لسمعة القنصلية السعوديه!! لكن انتو بتسيئو لسمعة وطنكم وبلدك الاردن ومع مين مع اخوانكم من ابناء وطنكم .
وضل نفسي اسال سؤال واحد !! المواطن وهو في بلده وست زيارات للقنصليه اتبهدل كل هلبهدله!!
معناته لما يروح عسعوديه شو راح يصير فيه ؟؟؟؟
|
